حنظلة القاري
عضو مميز
|
لا تفهموني غلط
سلامات  .
بعد منعي من تنزيل صوري بحجة إني ماني عضو مميز.
قررت إني تابع معكن بهالمنتدى لحتى نال شهادة تميزي وبعدين نزل صوري على
كيفي.
وبما إني هلق ماني مميِّز "بكسر الياء المشددة" بطلب منكن تسامحوني
على خرابيطي.
دوَّرت على زاوية نأد بالمنتدى فما لقيت إلا بالأرشيف المنسي ,على ذكر الأرشيف
ليش ما عندكن أرشيف بالمنتدى.
عشان هيك قررت إني إفتح هالعزوية الناقدة للمنتدى وجماعتو ,
بلكي_ أي بركي وبالعربية يمكن..راجع لسان القاريين_بغضر نبهكن لشغلات
ما كنتو منتبهيلها, أو بتقنعوني أنو رأيي كان ماو بمحلو.
ألتلكن من أبل إنو شعاري"النأد البناء والبناء فقط".
وجالكن يامشرفين ويا أعضاء واحد يوجعلكن راسكن.
يالله _بتوصوا شي_ راجعلكن.
____________________________
عم بستنى تنزيل الصورة اللي بعتها عالبريد يا مشرفين
تم تعديل هذه المشاركة بتاريخ 28-2-2007 الساعة 19:07 من قبل: محمد حمود
|
|
28-2-2007
15:52
|
|
السيد بطاطا
عضو مميز
|
قسماً بالله حاسس حالي بعرفك 
طيب فرجينا هالنقد البناء
بناء
معك بلوك؟
|
|
28-2-2007
18:18
|
|
حنظلة القاري
عضو مميز
|
سلام مبجل , أحلى من الحنظل.
-اليوم رح إفتح أول صفحة بموضوعي ورح تكون تشخيص لحالة المنتدى العامة
وبعدين شوي شوي بنصير نفصل ونبلش نقطة نقطة أو(نأدة نأدة),رح نبدا
بالتسلسل و"حبة حبة يا علام"
*درجة حرارة المنتدى تتراوح بين (0-5)مئوية يعني في شوية برودة ,بس أحياناً
بترتفع حرارتو للأربعين وبيصير يغلي لكن سرعان ما بيبرد,متل ما بيقولوا صايبتو
زنطارية, بطلب من خدمات المشفى أنو يلاقولو دوا إلا إذا كان هنن بدهن دوا وأكيد
الدوا عند الأعضاوات.
*جماعة الغربتلية-تحية إلهن-صايرين متل الدينمو المحرك للمنتدى وعم يلاقو فيه
صلة الوصل بضيعتهن الحبيبة,بس أحياناً بتلاقيهن عم يحكونا من الغرب بينما نحنا
بنكون بالشرق.
*بنفس الوقت بنلاقي إحجام كبير من الساكنين في قارةعن المشاركة ,وكأنو
المنتدى ماو إلهن وهدا نص مصيبة, بس لما بتسأل واحد واعي مثقف عن رأيو
بالموقع فبيبتسم ابتسامة ساخرة وبيقولك إنو موقع للسوالف اللي بلا طعمة
وللتنظير, وبيزداد تعجبك لما بتسمع هالجواب من أكتر من واحد , بتسأل حالك وين
الغلط؟
*الشباب الفتي غايب عن المنتدى والأسباب عديدة لكنها مهملة, وكأنو هالشباب
ما بيعنونا, يعني الأعما ما بين (14-25)شبه غايبين عن المنتدى ,وحتى الأطفال
مافي غير تلات أو أربع أطفال عم ينزلوا عالموقع بتوجيه أهلهن, بالرغم من إنتشار
ثقافة الكمبيوتر والنت في الضيعة ونزولها عالمناهج المدرسية.
*جماعة المثقفين عم يزودوها شوي وعم يتقنعوا بالمصطلحات والسفسطة وصف
الكلام والنتيجة أنو هالقري لما عم يقرا متل هيك مشاركات عم يفكر إنو المنتدى
نخبوي ومانو متاح للجميع, يا سيدي من حقكن تبرزوا ثقافتكن بس ماو من حقكن
تطفشو لنا القراءعن طريق المبالغة بالاصطلاح.
*المنتدى تجتاحه عاصفة من الإكتئاب وعم يضل مكشر , والأعضاء رافعين لافتة -
إمنعوا الضحك-حتى ظرفاء المنتدى غاطين وما إلهن أثر, صار الجو بدو شوية طراوة.
*الرقابة عالموقع مفتحة عيونها عشرة على عشرة وما عم تفوتها فايتة بس طمنوا
بالكن أنا ماني من جماعة الإرهابيين.
*جماعة المشرفين ابتكروا وسيلة جديدة للقمع هي الهروب أو قطع الطريق وهادا
عطاهن صفة الغموض.
*لقاءات تربوية وخدمية وثقافية وتاريخية, عم تعطي للمنتدى شي من الحركة
الطيفة,بس للأسف عم تكتفي بالعناوين وتترك التفاصيل, عم تكون باردة وأقرب
للهزلية والشكلية,وعم يحسبوا ستين إلف حساب ٌبل ما يصعّدوا الحوار وما عم
يعطزنا من الجمل إدنو.
*بادرة جديدة للعلم والثقافة, فورا انحطت تحت المشرحة قبل ما تكتمل ولادتها, وما
عم تلاقي مين يحملها فجماعة المثقفين والأساتذة والدكاترة بيتحججوا بالإنشغال,
عشان هيك باقترح يكون فيه وسائل جذب للشباب لحتى يكونا هنن عماد هالجمعية.
*هادا الموجز والتفاصيل رح تيجي تباعاً.
سلام معسَّل ينسي طعم الحنظل.
____________________________
تم تعديل هذه المشاركة بتاريخ 1-3-2007 الساعة 21:49 من قبل: محمد حمود
|
|
1-3-2007
12:32
|
|
مسعود حمود
عضو مميز
|
السلام عليكم ...
بصراحة أنا كتير بحبو لحنظلة من وقت كنت صغير .. بس ما كنت أعرف إنو من قارة
كتير حلوة كلماتك .. ونأدك ، بس عندي كم سؤال يا ريت تجاوبني عليهن:
1- ( المبالغة بالاصطلاح ) طفشتني متل ما طفشت الشباب اللي مانهم مسأفين متلي ، بس ممكن تشرحلي شو معنات ( سفسطة ) اللي حكيت عنها فوء ؟؟؟
2- شو رأيك إنو نحنا اللي مانا مسأفين ،نعمل مشاركات بعيدة عن السآفة ونشارك فيها ، ونترك المسأفين لحالهم ، بدل ما ننأدهم من بعيد لبعيد ؟؟
3- كتير منيح إنك عم تكتب يالآري ، بس شو منشان هل كم كلمة اللي مارئين بمشاركاتك متل: ( سرعان ،عشان هيك ،تجتاحه ... الخ ) لأني ما لقيتهن بكتيب ( لسان الآريين ) ؟؟
4- هيدا اللي عم يؤلك إنو المنتدى صاير للسوالف اللي ما إلها طعمة ، يا ترى عندو شي سالفة عليها طعمة يحكيلنا ياها ، منكون ممنونين منك ومنو ؟؟
يا الله ، بخاطرك ...
لأ وأف شوي ، نسيت شغلة ، شو منشان طاقية حنظلة ؟؟
بخاطرك ، أويم عيدوها ، والله فرحنا فيكن ، سلم على الجميع ، .. معزوم بكرة عل المتة ..
.
----------------------------------
مدونتي
|
|
1-3-2007
18:04
|
|
حسن البريدي
مشرف
|
مراحب..
من الأمور الممتعة في الحوار .. إذا كنت متلقــي لمشاركةٍ ما .. لشخص من ذوي الاسماء المستعارة .. وأنت تعرفه شخصياً .. وتعرف اسمه الحقيقــي .. وتعرف أدق التفاصيــل التي تضم ( حركة الشفاه ،، ونبرة الصوت ،، وإشارات اليدين ،، والجلسة ،، وحركات الحواجب .. الــخ ) .. ثم تقرأ مشاركته .. بعد أن تضع خياله نصب عينيــك .. أي .. مثل الخلفيــة .. خلف النص .. خاصته ..
بالفعــل أمر مثيــر للمتعة ..وخاصةً إذا كان يتقن اللهجة القاريــة الغارقـة في بحر من القدم ..
شكراً لك يا حنظلــة .. على ملاحظاتك .. القيمة .. فهمت .. صــح ...؟..!!..
العوافي.
----------------------------------
- كن كالغيث.. أينما هلَّ ؛ نفع ..
تم تعديل هذه المشاركة بتاريخ 1-3-2007 الساعة 21:33 من قبل: حسن البريدي
|
|
1-3-2007
21:30
|
|
أحمد زين الدين
عضو مميز
|
لاتحرمونا
لاتحرمنا المتعة أخي حسن وعرّفنا بالأخ حنظلة ولو عن طريق الإيميل
شوَّقتنا يارجل
----------------------------------
ليس العاجز مَن يملك عضواً عاجزاً أو أكثر .. إنّما العاجز هو مَن يعجز عن استخدام أعضائه السليمة بالشكل السليم
|
|
1-3-2007
21:47
|
|
حنظلة القاري
عضو مميز
|
سلامات .
ما بلشنا بالتفاصيل بس في واحد جاية يعرج بحارة المكرسحين,وبدو يتغدا فينا قبل
ما نتعشى فيه, بقول له كان جاي دورك عالطريق بس إنت جيت على إيديك وإجريك
ومتل ما بيقولوا(اللي في شوكة بتنغزه) ,وكرمال محبتك إلي بصغرك رح خفف
لهجتي معك, ورح جاوبك على أسئلتك.
1- سفسطة معناها بالقاري فذلكة أو معلمة أو أظ علوم, وبالعربي بدك تسأل واحد
مسكف.
2- لا تشملني معك وتنسبلي السكافة لأنو أنا شغلتي اللي بعتز فيها
التسكع,وبالنسبة لأقتراحك بقول لك متل ما بيقول المتل(بديل ما تقول لها كش
اكسير إجرها)
3-أنا ما ادعيت إني عم بكتب بالقاري, وإذا بدي أكتب بالقاري المحط مارح يفهم
عليي حدا, وهالكام الكلمة اللي عم مرقهن عشان يتقبلوا حكيي جماعة
المسكفين, وما يحسبوني متخلف.
4-بفهم من حكيك إنو الغلط عند اللي جاوبني بهالجواب, كتير منيح عطيني حل
لنفهم أمتالو أنو مشاركات المنتدى ما إلها طعمة,
برضو كويس اللي قدرت اكشف وجه مسعود حمود القاري, لأنو من كتر براعتك
بالفصحى حسبناك جاية من التاريخ ومانك عايش بقارة, وهيدي الشغلة إيجابية عند
اللي بيقدروا ان شا الله كون منهن
يا الله مع السلامة ...
ولا وأف نسيت إنك نسيت شغلة, عشان طاقيتي
هيدي لما إستاذي حنظلة العربي , أجازني بحرفة التسكع توجني بها الطاقية
الشيشانية لأنو عنا بقارة في برد بيشابه برد روسيا , ولما جبتها معي عالضيعة
درجت موضة , وبعدين صارت من الزي الرسمي لجماعة البشمرجة.
دخيلك اعذرني منشان المتة لأنو من شوي ضارب فتة راس آرية على كيف كيفك ما
بيحلى بعدها غير النوم, تمنيت لو بيخلوني نزل الصور لحتى فرجيك هالمنظرالفخم
منيح إنو هالأغنيا تركولنا متل هالأكلات الفخمة ونسيوها بحجة إنها بتاكل شغل.
خلينا نشتغل شو في ورانا طول النهار عم نتسكع.
راجع للنأد بعد فترة.......استنوني
_______________________________________
في صورة عم بستى تنزل بمشاركتي السابقة وينيا.
|
|
1-3-2007
21:53
|
|
مسعود حمود
عضو مميز
|
السلام عليكم ..
سلام
.
----------------------------------
مدونتي
|
|
1-3-2007
22:26
|
|
حنظلة القاري
عضو مميز
|
العوافي.
عتاب عالماشي.
بوجه كلامي للكل والكلية,صار لازم نعرف أنو هالأشخاص الآعدين ورا
لوحة المفاتيح هنن بشر إلهن أحاسيس ومشاعر, وكمان صارلازم نعرف أنو أغلب
اللي عم ينزلوا عالمنتدى إذا ماو الكل عندهن عقول بتوزع فهم على دول
وبيلقطوها عالطاير, منشين هاك الله يرضى عليكن ديروا بالكن على حالكن ودوزنوا
كلامكن لأنو حتى السلام اللي ماو بمحلو بيئذي,وأنتو أهل الفهم والأدب
سلامات نابعة من القلب ما لها غير وجه واحد هو المحبة.
|
|
4-3-2007
20:03
|
|
ابو المجد
عضو مميز
|
التسكع
يعني أخ حنظلة بدي منك شوية معلومات عن التسكع باعتبارك قلت إنها شغلتك
يللي بتعتز فيها( رغم أنه كلمة قلت صايرة مشكلة بهالموقع ) شو بتتطلب هالمهنة
بدها محل معين توقف فيه وماحدا يزيحمك عليه لأنو رحت لوقف هنيك بالساحة حد
دكانة ربيح لاقي في نيس واقفة ومرة تانية لقيت مكبوب يمكن أنو زيت محروق من
عند جارو مصلح الموتورات ياترى بتعرف ليش ياترى غيرة طيب وين بدي روح وشو
لازم الواحد يسوي وشو لازم يلبس بكفي بنطلون كوبوي أصلي وقميص مفكوكة
بعض زراره وطوق برئبتي أحلى شي يمكن هيدا الطوق وسنسال بئيدي في داعي
للموبايل وشو شكلو لهلئ مالئيت حل ففكرت بعقلي هالمرة قلت هيت لأركب موتور
جبلي وسوقوا على دولاب واحد عند الصبح وعند الضهر لأنوا أنا مابتعشى بس أنا
مابعرف سوق موتور بلأصل كيف بدي سوق هيدا الموتور الجبلي عالي كتير عليي
لازم فكر بشغلة تانية فيك تساعدني بالتفكير يعني هلق وأنا قاعد أفا لوحة المفاتيح
مافيني اتسكع وأكتب حيلى شي وألفت نظر الناس ياأخي ناس رح تسبني وناس رح
تمدحني شو رأيك بهالحل باعتبارك خبير في فيده ياترى أنا عم استنى جويبك بفيرغ
الصبر ولاتفهمني غلط
----------------------------------
كن جميلاً ... ترى الوجود جميلاً
تم تعديل هذه المشاركة بتاريخ 5-3-2007 الساعة 06:48 من قبل: ابو المجد
|
|
5-3-2007
06:41
|
|
حنظلة القاري
عضو مميز
|
كمان العوافي.
يا بدع النأد .....ياجمال النأد
اليوم رح تكون محطتنا عند المشرفين, وهيدي المشاركة مهددة بالحذف.
المشرفين صايرين مسرفين على أنفسهم بالنسبة للمنتدى, وراميين الأحمال
على واحد منهن, بقول له"الله يعطيك العافية", وهيدا المشرف يا حسرتي بدو يضل
متمسر ورا الكمبيوتر وبنفس الوقت بدو يركض بين البلدية والمدارس والجمعية
الخيرية, ويرد يركض بين الحارات والزواقيق ليقابل فلان وفلان, وبيركض وبيركض
والعشا خبيزة, ليش ياحزركن لأنو إيد وحدة ما بتزئف.
أما بائي المشرفين فبيقعدوا إذا فطنوا بالموئع _وهم يحتسون كأساً من المتة_
وبيبلشوا يعلقوا عفلان ويعدلوا لفلان,ويحذفوا لفلان , بس ماو طالع بالإيد شي
لأنهن المشرفين ومعهن المأصات والمحايات , أما اللي متلي يا حسرة إسى بدو
ست سبع تا ليف مشاركة ليصير مميز.
هلق البعض بيتحجج بالشغل , يا عمي كلنا مشغولين
وخدوني مثال طول النهار عم بتسكع وماني فاضي حك راسي
يعني لا أما بتأشرفوا علينا متل الناس والخلق لا أما تركوا هالمصلحة.
وبقول له للمشرف حسن إنو لا يغرك الإيميل لأنو لواحد صاحبي.
على كلٍ إذا ما بتعرفني بتتعرف عليي.
يالله حاجة مخاطركن.
_____________________
عم بستنى الصورة
|
|
5-3-2007
10:37
|
|
حنظلة القاري
عضو مميز
|
سلامات أبو المجد.
بقولك بليلك هالشغلة, لأنو وحياتك أنا مجبور عليها لكني بعتزفيها لأني صرت
محترف.
بعدين الشي اللي كنت بدك تسوي إسمو تمجْهُل ماو تسكُّع, والفرق بين الكلمتين
كبير.
يعني إذا بيصحلي شغلة أحسن من التسكع ما بقول لأ, بس لمل بنحط بين خيارين
إما التسكع أو التهريب أكيد صاحب الضمير متلي بدو يختار التسكع بس هي شغلة
ما بتطعمي خبز ناهيك عن المشاكل والبهادل اللي بتسببها
وبقول لك بالنهاية إذا إنت متلي فارغ جبرياً ففيك تفيد هالناس اللي عم تقرالك
عالأنترنت, يعني أحسن ما نضرهن بنفيدهن أو على الأقل بنسليهن بالخبرات
الموجودة عنا.
يا أخي مانك بحاجة للتسكع ما شا الله عنك عضو مميز وألف واحد ووحدة بيتمناك.
كمان لا تفهمني غلط.
مخاطرك ,أويم عيدها على قولة مسعود(سلام إلو).
|
|
5-3-2007
10:39
|
|
يعرب
عضو مميز
|
مرحبا خيو
عجبتني فكره الحكي متل خلئ الله ما بتحكي وبلا إزا وبلا مزا وئلت لجرب معكن.
زكرتني يا حنضله بمسرحية ( رحلة حنظله) يلي صارت من شي عشر سنين وئتها حضرتها، وهلئ وأنا عم بتزكرها لئيت شأد في شبه بينك وبينوا لأنو المسرحيه بتحكي عن وِحد عميتسكع من بلد لبلد وما بيطلع معو شي.
شربت مته؟ هيت الكيسه لصبلك
المهم عجبني نأد صاحبك الواعي والمسئف للموئع وياريت بتخدمنا وبتئنع صاحبك يجي ويشاركنا بالنئاش ليرفع....السويه ويخلصنا من التنظير لأنو مابيصير يبئ الموئع هيك وخصوصي أنو كل مين هب ودب بيشوف الموئع، وما بدنا يئولو أنو هدول إهل أرا بيحبوا التنزير وبس.
خلصت من المته يلا غراســــــه
بئ حول نيحنا
----------------------------------
عذراً التوقيع شــــــــخصي جــداً
|
|
5-3-2007
10:45
|
|
أحمد زين الدين
عضو مميز
|
الإخوة الكرام .. لاتفهموني غلط
لاأريد أن يقول البعض أنني أدعي المثالية أو أبتغيها ، لكنني أرى أنني مضطرٌّ لرجائكم بعدم تعميم العامية بهذا الشكل الكثيف ، فنحن جميعاً نتأثّر بمضمون مداخلاتكم الجميل ، لكنَّ الشكل مهمٌّ أيضاً ولابدَّ من التأثُّر به ، وهذا ليس إيجابياً بكلِّ تأكيد
خاصة وأنَّ بعض المداخلات بالعامية حطّمت الرقم القياسي بالأخطاء الإملائية والنحوية
آسف لأي تأثير غير إيجابي لملاحظتي
وشكراً لكم
----------------------------------
ليس العاجز مَن يملك عضواً عاجزاً أو أكثر .. إنّما العاجز هو مَن يعجز عن استخدام أعضائه السليمة بالشكل السليم
تم تعديل هذه المشاركة بتاريخ 5-3-2007 الساعة 12:25 من قبل: أحمد زين الدين
|
|
5-3-2007
11:12
|
|
حنظلة القاري
عضو مميز
|
نأدة عالسريع.
يا أخي أحمد الحكي بالعامية كان رد فعل ماو فعل بحد ذاتو, وبالبنسبة إلي أنا
بعشق الفصحى , بس لما بتصير المشاركات غوغائية وبدها حلم عنتر ليفسر
مصطلحاتها ,أكيد أمتالي رح ينفروا من هالأسلوب ويرجعوا للعامية اللي أقرب
لللقلب ولاحظ إني لهلق ماحكيت بالآري المحط ,
يا عمي الموقع للجميع لا تخلوا هالعالم يطفشوا منو , وساعدونا لنجذب متصفحي
النت من قارة للموقع, من جهتي بوعدكن خفف العامية لحتى ما يقول حدا عني إني
متعصب, بس أنتو قنعولنا هالكام عضو يخففولنا من حدة تنظيرهن .
أما إنت يا يعرب فبدك حلقة كاملة ,خصوصي بعد هالمشاركات الأخيرة إلك.
شي بتطلب من أرايبك المشرف إنو يحط كنيتكن براس القائمة.
وشي بتسأل حضرة النايب عن رأيو بالمرأة.
وشي بتزعلنا الدكتور أبو عمر
دير بالك على حالك, الله يرضى عليك
على ذكر المرأة , كأنو صوت الإتحاد النسائي غفيان بهالإيام,أكيد في غلط بس وين
هيدا اللي بدي أعرفو.
سلامات
|
|
5-3-2007
12:40
|
|
محمد حمود
مشرف
|
أنا مع الأخ أحمد زين الدين بضرورة الابتعاد عن استخدام العامية لأنها تصبح صعبة الفهم عندما تكتب.
أما بالنسبة لحنظلة فحتى الآن لم أستفد شيئاً من نقدك البناء، كما أنني وضعت لك الصورتين اللتين تم إرسالهما إلى بريد الموقع والصورة الثانية كما ترى في الأعلى مكتوب عليها "هذه أول نقلة بلوك" ولا أدري ماعلاقتها بالموضوع؟
أتمنى منك تقديم نقد مفيد يرقى بالمنتدى والموقع.
|
|
5-3-2007
12:45
|
|
أحمد زين الدين
عضو مميز
|
الأخ حنظله
أرجو أن تتوجّه بملاحظاتك القيِّمة هذه مباشرة ( مستخدماً أسلوبك الجميل ) إلى الأشخاص الذين تقصدهم وبالأسماء ليرى كلٌّ منّا آراء الآخرين في أسلوبه وكتاباته فيتدارك ماهو غير ضروري في اسلوبه ويُعدِّله بما يُسهِّل فهمه وإيضاحه
أرجو أن لاتعفِ أي مشارك وأن تبدأ بي إذا أحببت
شاكراً لك مساهماتك
----------------------------------
ليس العاجز مَن يملك عضواً عاجزاً أو أكثر .. إنّما العاجز هو مَن يعجز عن استخدام أعضائه السليمة بالشكل السليم
تم تعديل هذه المشاركة بتاريخ 5-3-2007 الساعة 13:30 من قبل: أحمد زين الدين
|
|
5-3-2007
13:01
|
|
محمد حمود
مشرف
|
هذه هي أحدث صورة وصلتنا من حنظلة:
|
|
5-3-2007
13:12
|
|
حنظلة القاري
عضو مميز
|
عجيب
كل هالنأد مانو بناء, لكين شو اسعني عم سوي بالمنتدى أنا, ولا لأنو اليوم نأدتكن
جماعة المشرفين صرتو بدك تتمأطعوا فيني, ألتكن من أول لا تفهموني غلط .
بعدين تعال لهون كل موئع قارة دوت كوم ما بيطلعلو زاوية وحدة بتحكي بالعامية.
بالنسبة للبلوك متل ماو للفصحى مصطلحاتها الغامضة كمان للعامية مصطلحتها
وبدك تلاحظ السيد بطاطا هو اللي طلب بلوك.
قول ما بدك تنزل الصور وبس ,صدقني ما بعتب عليك,
والله خايف بعد هالرقي بالمنتدى إنو يوقع على بند رقبتو وماحدا يسمي عليه.
بسيطة تعودنا عالقمع.
شرفونا جماعة المشرفين بس أوعى تفهمونا غلط
أخي أحمد لاتوصي حريص راجعلك بعد فترة.
مخاطركن
|
|
5-3-2007
13:14
|
|
السيد بطاطا
عضو مميز
|
ما شاء الله
الموضوع لقى قبولاً لم أتوقعه
يبدو أن في الأمر سراً
في إثارة بالموضوع
موفق يا حنظلة بمهمتك
والعامية أغرب شي
هي دي عامية ولا إيه!!!؟؟ شكلها عامـ(فصحية)ــية
|
|
5-3-2007
16:42
|
|
يعرب
عضو مميز
|
بس تذكرت شغله.....
والله يا حنضله إزا بتجتمع أنت و راغب فخيدات بتعملوا أحلى شغل
يلا ...مخــــــــــــــــــــــــــاطرك
----------------------------------
عذراً التوقيع شــــــــخصي جــداً
|
|
5-3-2007
17:06
|
|
أبو خالد
عضو مميز
|
السلام عليكم ..
وتحياتي للجميع ...
أحلى تحية لحنظلتنا !
الي بعرفوا عن معلمك - الله يرحموا - انو كان عروبي وصاحب مبدأ ويحمل هم
القضية في أدق تفاصيل حياتو ... الي انتهت باغتيالوا لأنوا إدر يأثر وعمل شي
من خلال نشاطو و (( نأدو .. ) ( أقصد من هو خلف شخصية حنظلة )
أول شي بدك تؤلي كيف تعلمت منو التسكع وهو الي ماكان يفتر عن النضال
تاني شغلة طائيتك أأرب في شكلها للطوائي الي بيلبسوها الاخوة في المغرب
العربي ومعلمك العروبي شو أخدوا عروسيا والشــــــــــــيشــــــــــــــــان
ولما هداك طائية تدفي أرعتك ما حسن يجبلك شي بصـطار أحسن مانك عما
تطبش حفيان
روح روح خيط بغير هالمسلة وتروك النأد و الرسم لأهلو ا
------------
عفطنيس الآري .......
.
----------------------------------
إلهي إن كان هذا حلمك على من طغى و قال أنا ربكم الأعلى ! ............................................. فكيف حلمك على من سجد لك و قال سبحان ربي الأعلى ؟ ................................................... أبو خالد
|
|
5-3-2007
21:20
|
|
حنظلة القاري
عضو مميز
|
سلامات .
النأدة اليوم رح تكون مواكبة للحدث.
الدنيا علآنة بحاكورة مضافة الموئع , وإنفتاح ماو طبيعي صاير عند أهل آرة عم يفوتو
خزيت العين عنهن ويناقشوا ويصعدوا الحوار وينكشو ويأنكلو ولأ وكمان عم يجوا من
فوء بعناوين متل الكلمة الحرة , كتير منيح بتئولو إنو عنا ما في إنفتاح
تعالوا شوفوا أهل آرة لما بينفتحوا,هيدا كلو ماو مشكلة بس لما بتلائي على الأرض
شي مناقض وبتلائي واحدهن ما بيسترجي يفتح تمو بمتل هاك مواضيع بتئول شو
أهل آرة عندهن إنفصام شخصية.
والله بعرف إنكن من حبسة ألبكن عم تفشوا أهركن عالمنتدى , بس ليش ما بتكون
فشة الأهر, على أرض الواقع كمان يعني ليش ما بنبدا نسد أفواه المتخاذلين
وبنحط العصي بعجلات المنحرفين, بس على أرض الواقع ماو على الصفحات
الإفتراضية, والله صار بدها حركة وبالحركة بركة.
عندي إقتراح بتمنى يتاخد على محمل الجد ليش ما واحد منكن إنتو اللي فهمانين
واقع الضيعة إنو يترشح كمرشح مستقل للبرلمان, هلئ بتقولولي إنو ما في دعم
مادي, يا سيدي واحد منكن ماكن شوي يطرح برنامجو على بعض أغنياء آرة اللي
إلهن أيادي طويلة بفعل الخير لحتى يدعمو ,وأكيد لما رح يطل على جماهير آرة وهو
عارف بأوضاعهن وعايشها رح يضمن حوالي عشرين إلف صوت , وأنا مستعد من
هلئ إني علئلوا صورو بالشوارع وأنا بإجريي الحافيين.
ليش إحلامنا بتوئف عند رئيس البلدية وبس, وحتى هيدا المنصب ما عنا أمل
يستلمو واحد خرجو.
هيه إنتو اللي عم تشتغلو بكنيات آرة هالمعضلة الخطيرة شو رأيكن بكلامي
يالله مخاطركن
______________________________
يا حنظلة ما يهزك ريح.
تم تعديل هذه المشاركة بتاريخ 6-3-2007 الساعة 12:36 من قبل: حنظلة القاري
|
|
6-3-2007
12:35
|
|
حنظلة القاري
عضو مميز
|
سلامات .
الحمد لله إنو اللي بدي أنؤدهن عم يجوني على إيديهن وإجريهن.
عفطنيس مدوخ المنتدى بإسمو الخنفشاري, ماو تيريلكن إنو زلمة درويش
ومخربط بين اسمو كلمة المرور تبعتو.
أبل ما أنأدو رح فسرلو الخربطة اللي وئع فيها, أول شي أنا معلمي حنظلة
ماو ناجي العلي وإسعو على قيد الحياة ما توفى, لأ وإسع عمرو عشرسنين وإذا
مانك مصدقني اسأل أهل السقافة.
معلمي صحيح علمني التسكع بس هيدا ما بيعني إنو كان متسكع , خود مثال
بسيط ((معلم جابر بن حيان أبو الكيميا هو الإمام جعفر الصادق))وأنا ما تعديت
على التسكع تعدي بس جاني غصباً عني, مشين هاك رحت درست أصولو
وجيتلكن, وكل مناي إني أخلص منو,تصور أخي عفطنيس لو اني متعلم النضال من
معلمي وبعدين جاية على آرة أكيد بدها تكون نهايتي رئيس أحد كتائب البشمرجة.
بالنسبة للطائية , إذا استفسرت عن الموضوع بتلائي إنو عم تيجينا من دول الخليج
فأنو ى أعجب إنو معلمي يروح عالشيشان ولا إنو الطاقية الشيشانية تنباع
بالخليج,ومن كل عئلك إنو واحد بيجيز واحد بمصلحة أو بعلم آم بيعطي
شاروخ ....هَزٌلتْ.
كان عندي بوط جيش أوخدوا لعند العساكر يبدلولي ياه لما يعتئ بس هلئ حتى
العساكر ما إسى فيهن خير, خلصنا من أسإلتك.
جا دوري لإسأل, عم تئوللي خلي النأد والرسم لأهلو ويننا ماني شايف حدا منهن
لتكون أصدك على حالك إنت آخر واحد بيحقلوا يحكي هالكلام لأنو لهلئ بهالكام
شهر اللي طالعتهن بالمنتدى ما لئيتلك ولا مبادرة بموضوع, حتى لما بادرت بموضوع
اسمو "استشارة قانونية" لزقتو بالأستاذ حسن ناصيف
يعني إنتو و اعذرني على هالكلمة متل الأطاط المتخبية لا أما بيجي واحد معو أكلة
طيبة آم بيتمسحوا فيه وبيهزوا بدنبهن لا أما بيجي واحد بيضربهن بحجر آم
بيخرمشوه وبيهربوا.
بعدين مانك ملاحظ إنت وأمتالك بتهتمو بالشكل أكتر من الموضوع يعني لاحئيني
على طائيتي وشاروخي وعاميتي وتاركين المهم وهو نأدي
يا أخي نؤدو نأدي والله ما بزعل .
سلامي إلك خلينا من الأول صحبة والنأد على أد المحبة ,وإنت روح خيط بغير
مسلتي.
مخاطركن
|
|
6-3-2007
14:47
|
|
ابن البيادر
عضو مميز
|
الأخ حنظلة حفظه الله،
اللغة العامية لغة شفهية غير مكتوبة، و ماتقوم به هو اختراع بحد ذاته، وفقك الله ورعاك.
أنت تبحث عن احترام الاخرين، و لكنك لا تحترم الآخرين بدليل أن مدير الموقع و الأخ أحمد طلبا منك عدم الكتابة بهذه اللغة "الحنظلية"، ولكنك لم تستجب لذلك. في نفس الوقت تستهين بعقولنا بهذه "الكتابة" اللتي لا تُكتب، فارحمنا رحمك الله و احترم الآخرين حتى يحترموك.
لو أرسلت رسوماتك إلى جريدة، فهل ستنشرها؟ لماذا؟ أين خقوق الآخرين؟
أخيراً، أنا عربي مسلم....و أرجو أن أن ترد على مشاركتي بلغة عربية سليمة، ولك الحق أن تتكلم شقهياً بأي لهجة شئت.
أخوك
ابن البيادر
تم تعديل هذه المشاركة بتاريخ 6-3-2007 الساعة 17:20 من قبل: ابن البيادر
|
|
6-3-2007
15:17
|
|
حسن البريدي
مشرف
|
تحياتــي ..
شكراً لك أخي ابن البيادر على التعليــق .. لأنه مناسب .. وجاء في محلــه تماماً ..
ومرحباً بك أخي حنظلة دائماً ..
----------------------------------
- كن كالغيث.. أينما هلَّ ؛ نفع ..
تم تعديل هذه المشاركة بتاريخ 6-3-2007 الساعة 20:54 من قبل: حسن البريدي
|
|
6-3-2007
20:50
|
|
